Ágrip af sögu Kaupfélags Borgfirðinga svf.

Kaupfélag Borgfirðinga er stofnað 4. janúar 1904.  Félagið var í upphafi rekið sem pöntunarfélag og sá þá um innkaup skv. fyrirframgerðum pöntunum félagsmanna.

Félagið hóf rekstur söludeildar 1910 og var byggt hús yfir hana 1912.  Húsið er kallað Salka og stendur nú við Skúlagötu 7.   Árið 1916 er flutt í Englendingavík í Sjávarborg og þar er verslun félagsins til 1960 þegar flutt er í nýtt stórhýsi að Egilsgötu 11.  Eftir að Borgarfjarðarbrúin kom til sögunar fluttist þungamiðja Borgarness til og ljóst varð að verslun og þjónusta félagsins þurfti að komast á nýjan stað sem væri í alfaraleið.   Árið 1991 hóf Hyrnan starfsemi og hefur síðan verið helst þjónustumiðstöð við ferðamenn við hringveginn.  Árið 2000 var Hyrnutorg reist og var dagvöruverslun og skrifstofur fluttar þangað í nóvember það ár.  Endanlega flutti KB úr gamla bænum í Borgarnesi árið 2003 þegar byggt var nýtt hús yfir Byggingarvörudeild og hún flutt að Egilsholti 2, við þjóðvegin norður úr bænum.

Framan af var félagið eingöngu í verslunarstarfsemi en 1931 tekur félagið við rekstri sláturhúss í Borgarnesi og rekstri Mjallar sem varð MSB og hóf þar úrvinnslu mjólkur.

Mikil uppbygging var í Brákarey 1966 þegar nýtt sláturhús er tekið í notkun.  Það hús var hið fullkomnasta í landinu og var hægt að slátra 2700 kindum á dag.  Sama ár hefst rekstur kjötvinnslu.

Flutningastarfsemi var á vegum félagsins frá árinu 1943 og var gerður út floti flutningabíla sem sáu um flutninga félagsins og annarra á svæðinu.  Var þar um að ræða vöruflutningar mest milli Reykjavíkur og Borgarness og mjólkurflutninga sem voru umtalsverðir.   Flutningastarfsemi félagsins var seld Samskipum 1999 þegar félagið var sérgreint fyrst og fremst í verslun-og þjónustu.

Upp úr 1990 fór rekstur félagsins að þyngjast og í framhaldinu urðu miklar breytingar á rekstri þess.  Sláturhúsi og kjötvinnslu var breytt í sjálfstætt hlutafélag 1993, Afurðarsölunnar í Borgarnesi hf sem síðar varð að tveimur félögum, Sláturfélagi Vesturlands og Borgarnes kjötvörum.  Var þetta tilraun til þess að sameina hagmunaðila, þ.e. félagið og bændur í þessum rekstri.  Enduðu þessi félög sem hluti af Goða hf ári 2000, en það félag fór í þrot fljótlega eftir stofnun.  

Miklar deilur urðu í héraðinu þegar samþykkt var að úrelda Mjólkursamlag félagsins, en vegna mikillar umframfjárfestingar í greininni var talið nauðsynlegt að minnka afkastagetu mjólkuriðnaði.  MSB hætti starfsemi um áramótin 1995.  KB hóf í samstarfi við aðra ýmsa iðnaðarstafsemi í Engjaáshúsinu sem gekk öll illa frá upphafi og var hætt fljótlega aftur, eftir mikið tap.

Á aðalfundi félagsins vorið 2001 var samþykkt að heimila stjórn þess að breyta rekstrareiningum félagsins í hlutafélagsform og leita eftir samstarfi við aðra.  Í upphafi árs 2002 tók síðan KB Borgarnesi ehf við öllum daglegum rekstri KB sem á eftir var eignarhaldsfélag.  Á miðju ári 2004 var síðan gengið til samstarfs við Kf. Suðurnesja með því að sameina rekstur KB Borgarnesi ehf inní Samkaup hf. 

Til baka